MENINE

‘A erin verz chei scurez dal tinel

dulà che Menine ‘e cusive,

d’estât, intant dai dopomisdìs,

co il soreli al slusive inmò alt

o quanche la lûs ‘e smontave

cun tarlups di colôrs delicâz.

‘A passavin fantaz lì di jê

seneôs di sintî la sô vôs,

di robâ, pleâz su la plane,

un riflès di neris pipinis;

bramosìns di sfiorâ lis sôs mans

e viodi une clome curvine

colâ in rizzoz su lis spalis.

Zingarâz di pinsîrs mataniz

i fantaz… e il timp al coreve:

‘a rivavin i refui d’autun

a dispierdi l’incjant dal balcon.

Sun chê rose fazzade, cumò,

i scurez ‘a son simpri sierâz

e il vert de vernîs discrodeât:

no s’impâr plui la muse ridint

a di chei ch’a cirin la biele

par ricamâ d’amôr ilusions.

Menine ‘e jè lade lontane:

‘e à lassât il borc cui siei zovins

par cusî tun tinel in ricès

(cui veris metûz juste in sfese)

l’insium di une femine mari.