LIS VÔS DI UNE CJASE DI CLAP

Cjase di clap, poiade tun cjanton

di un vieri curtilut sfodrât di grame,

fra un emolâr e un piçul poç di piere

tu polsis cui barcons clostrâts a strent.

Ator di te e à paronât l’urtie,

il vint al à ingrumât lis fueis d’autun;

si nicin sot i cops telis di rai,

spielis di soletât e di bandon.

Nancje il lusôr ormai no ti cjarece,

tu duarmis inte ombrene dal passât,

epûr jenfri i tiei clas nol è il cidin

ma un murmuiâ di vôs ch’o sint cul cûr.

Mi ven inte memorie un craçolâ

di zoculuts di len sore il pedrât,

e il ridi dindinant di un pâr di fruts

pierdûts intai mateçs de mularie.

L’è crot di fueis e sterp al è di pomis

chel emolâr tal mieç dal to curtîl,

ma nol è vueit di svuai e di cisic

ch’o sint come lambìc intal gno cjâf.

O vuei lâ vie di chi cun ‘ne sperance,

cjase di clap che tant tu mi âs spietât:

ch’e torni tai tiei mûrs a rivocâ

di veris vôs d’arint la melodie.